Monthly Archives: March 2013

Typical Bihari Middle Class Family

Standard

“road par park kar do bike kisi band dukaan ke saamne, parking ke paanch rupaye kaahe kharch karoge?”

 

mere hisaab se madhyam varg samaaj ke arthik vibhaajan ka sabse haasyaaspad paksh hai. na BPL card ke liye yogya, na mahenga chaawal khareedne ke yogya. dohri maar to ye hai ki jyadatar madhyam varg wale uchcha jaati ke hote hain aur aarakshan se bhi vanchit reh jaate hain. madhyam varg ka bahut rona hai. thoda mai yahaan rounga, thoda padhne waale comments mein royenge.

 

middle-class ko apne status(facebook wala status nahi, social status) ki sabse jyada chinta rehti hai. padosi ki car hai to hum bhi loan le kar khareedenge. car khareedi jaati hai. car me bachchaa winnie the poohlatkata hai. saal bhar bechaare petrol ki keemat ke sthaayi hone ka intezaar karte hain. aur saal bhar baad bank car lekar chali jaati hai. bachchaa poochhta hai- papa car kahaan gayi? papa kehte hain- mera beta car pe nahi, aeroplane pe chalega.

 

bihar ka middle-class shiksha ko bahut praathamikta deta hai. IAS ka sapna maths ke ‘x’ se jyada common hota hai. kisaan ho ya clerk ho- mera beta collector banega. beta paise ki kabhi tumhe koi dikkat nahi hone denge. zameen bech denge; loan le lenge, tum collector ban jaaoge to fir khareed loge. bihar mein padhai nahi hogi. dilli jaao, kota jaao….bihar mein padhaai nahi hogi. jha ji ka ldka bhi to banaaras mein padhta hai. beta, ladki ke chakkar mein kabhi mat padna, sehat ka sabse jyada dhyaan rakhna aur bas padhaai karna. aur phone daily karna jab tum free hoge. kabhi-kabhi mandir bhi chale jana.

 

khareedaari badi dilchasp hoti hai. khaaskar jab mahila ho. iss se sasta dikhaaiye. arey chhodiye ye to bahut kamzor hai. itna mahenga nahi chahiye. ye do din mein toot jaayega. loot rahe hain aaplog. bhaaisaahab door-mat bech rahe hain ya tajmahal ki kaaleen?. arey kya aap humara do ghanta waste kar diye aur kuchh khareedne laayak dikhaaye bhi nahi.

 

middle-class family mein ek motorcycle jaroor hoti hai. aur wo pulsar ya enfield nahi hoti, boxer ya splendor hoti hai. jab pita-putra uspe sawaari karte hain to pita ke updeshon ki seema nahi hoti. aur agar pariwaar ke bachche chhote hain to ek ko tel ki tanki pe bitha diya jata hai aur doosra typical-lady-on-bike-style mein baithi hui maa ki god mein baithta hai. vaahan ke peechhe ek bag bhi bandha hota hai. ye motorcyclein sahi maayane mein vaahak hain middle-class ki.

 

middle-class gharon ke darwaaje aawaz bahut karte hain. iss se chori ka khatra kam rehta hai. sofe ke gadde puraane hokar hard ho chuke hote hain. diwali me bachchon ko environment-friendly banaane ki bharpoor koshish kii jaati hai aur chhat par jalaaye gaye diye new year tak chhat par hi rehte hain.

 

middle class family ka bhojan aksar classic hota hai. mehnati log hote hain isliye paachan-shakti achchhi rehti hai aam taur par. aksar raat ke bhojan me pakaude ya kheer ya paneer ki sabji banaakar usey dinner ka naam diya jata hai. pita bade pyaar se putra ko chammach pakadna sikhata hai. par ant mein putra haath se khaane ki sabhyata ko hi barkaar rakhta hai.

 

bihar mein angrezi bolne ka bada mahattva hai. aathvi se dasvi ke chhaatron se rishtedaar aksar poochhte hain- arey beta, english medium mein padhte ho? kuchh bol ke bataao english mein. fir pita badi aashaa bhari nazron se putra ki taraf dekhta hai. aur chaar angrezi ki linein bolkar putra swaargik sukh ka anubhaw karta hai. rishtedaar kehte hain- bada honhaar bachcha hai. isko IAS ki taiyyari karwaaiye. 

 

middle class family mein saahitya bahut saraahaa jata hai. sarita, grihshobha, vanita ityaadi monthly magazines badi asaani se mil jaayenge. kuchh gharon mein akhand-jyoti aur kalyaan jaisi dhaarmik patrikaayein bhi aati hain. akhbaar bhi har roz aataa hai aur uska padhne ke alawa bhi kai tarah se upayog kiya jata hai. mahilaayein kisi vyanjan ki vidhi ko dhyaan se padhti hain aur kabhi-kabhi banaati bhi hain. in patrikaaon me sehat sambandhi jitne bhi nuskhe hote hain, ek baar beemaar padne par sab aajmaa liye jaate hain. bechara beemaar bachchaa pata nahi kin-kin cheezon ka soup aur juice peeta hai.

 

abhi tak sab bahut humorous laga hoga padhkar. lekin middle class ka bhi apna class hota hai. family mein aapas mein prem bahut hota hai. log jyadatar saath khaana khaate hain. putra pita ki izzat karta hai aur oonchi aawaaz mein kam se kam college life tak baat nahi karta hai. tabhi to upper class mein isey middle-class-values ya middle-class-shit bhi kahaa jata hai. mujhe ye shit pasand hai. aapka pataa nahi. 🙂